.

प्राय चलचित्रकर्मीहरुले काम गराएर पैसा दिदैनन् भन्ने चर्चा त नेपाली चलचित्र वृत्तमा चलिनै रहेको छ । कहिले सञ्चारकर्मी, कहिले प्राबिधिक त कहिले होटल ब्यवसायिहरुले आफुहरुलाई चलचित्रकर्मीहरुले पैसा नदिएको बताउदै आएका छन् । अझ केही समय अघि पोखराका होटल ब्यवसायिहरुले त चलचित्रकर्मीलाई आफ्नो होटलमा बस्न नदिने र दिनै परे अग्रिम भुक्तानी लिए मात्र राख्ने जनाएका थिए ।

केहि चलचित्रकर्मीहरुलाई छोडेर हेर्ने हो भने पटक पटक चलचित्रकर्मीहरुले पैसा नतिरेका खबरहरु पनि सार्वजनिक भएका छन्  र यसरी पैसा नपाउने ब्यक्तिहरुकै सुचिमा परेका छन् आइडियल डिजाइनका सुन्दर श्रेष्ठ । प्राय नेपाली चलचित्रको पोस्टर आइडियलमा नै डिजाइन हुने गर्दछ । अझ केही समय अघि सुन्दरले आफुसँग भएका अन्य चलचित्रका तस्विरहरु प्रयोग गरेर पनि चलचित्रकर्मीहरुले आफ्नो चलचित्रको पोष्टर तयार गर्ने गरेको बताएका थिए ।

हो यिनै सुन्दर श्रेष्ठ जसले चलचित्रकर्मीहरु सँग धेरै नै पैसा लिन बाँकि छ । आफ्नो जीन्दगीको कमाई मान्ने उनले चलचित्रकर्मीसँग १५ लाख भन्दा बढी रुपैया लिन बाँकी रहेको बताएका छन् । आजसम्म ७ सय भन्दा बढी चलचित्रको पोष्टर डिजाइन गरेको बताउने सुन्दरले आफुले चलचित्रकर्मीहरु सँग पैसा लिन रहेको खुलासा गरेका छन् । आफु चलचित्रकर्मीबाट नराम्रो सँग पिडित भएको बताउदै सुन्दरले चलचित्रकर्मीहरुमा इमान्दारिताको कमी हुने गरेको बताएका छन् ।

आफु २० वर्षदेखि यहि क्षेत्रमा काम गरिरहेको बताउने सुन्दरले केहि चलचित्रकर्मी फिल्मबाट नै पलायन भएको, कोही बिदेश गएको भन्दै आफ्नो मोटो रकम डुबेको गुनासो गरेका छन् । उनले कोही बाटोमा भेटिन्छन् तर उनिहरुले अब चाडै नै अर्को चलचित्र बनाउने र त्यो बेला पैसा मिलाउने बताउने गरेको तर त्यसपछि भेटन नआउने गरेको बताए । आफ्नो महत्वपूर्ण समय खर्चेर पोष्टर डिजाइन गर्ने गरेको बताउदै उनले चलचित्रकर्मीहरुलाई इमान्दार बन्नको लागी आग्रह गरेका छन् ।